सोलापूर : सोलापूर विद्यापीठातर्फे घेण्यात येणाऱ्या सृजनरंग व्यावसायिक नियतकालिक स्पर्धेत एन. के. ऑर्किड अभियांत्रिकी महाविद्यालयाच्या ‘ऑर्किड ऑरा २०१७’ला सर्वोत्कृष्ट नियतकालिक म्हणून गौरविण्यात आले.
विद्यार्थ्यांच्या सुप्त गुणांना वाव मिळावा व विद्यार्थ्यांमधील लेखक चिरंतन रहावा, यासाठी महाविद्यालय दर वर्षी ‘ऑर्किड ऑरा’ नियतकालिकाची निर्मिती करते. ‘ऑर्किड ऑरा २०१७’ या नियतकालिकाने मराठी, हिंदी, इंग्रजी, संस्कृत, उर्दू, कन्नड भाषांतून अर्थकारणपर लेख, विज्ञान व अभियांत्रिकी अशा विविध विभागांतून तब्बल २४ प्रथम पारितोषिके, नऊ द्वितीय पारितोषिके व पाच तृतीय अशी वैयक्तिक पारितोषिके पटकाविली आहेत.
सोलापूर विद्यापीठाचे कुलगुरू डॉ. एन. एन. मालदार व प्रमुख अतिथी रामानंद तीर्थ मराठवाडा विद्यापीठाचे माजी कुलगुरू डॉ. के. एस. कुलकर्णी यांच्या हस्ते हा पुरस्कार प्रदान करण्यात आला.
‘ऑर्किड ऑरा’ सलग दहा वर्षे हे नियतकालिक विद्यापीठाचे पारितोषिक प्रथम किंवा द्वितीय मिळवत आले आहे. या वर्षीच्या नियतकालिकामधून विद्यार्थ्यांनी शब्दांकित केलेल्या सिंधुताई सपकाळ, जयंत नारळीकर, प्रसिद्ध लेखिका सावी शर्मा अशा नामवंतांच्या मुलाखती विविध भाषांमधील ललित लेख, कविता, कथा, वैचारिक लेखन, एकांकिका, व्यक्तीचरित्र, अर्थकारणपर लेख, सामाजिक लेख कला व व्यंगचित्रे अशा विविध प्रकारांतून आपले लेखनकौशल्य सिद्ध केले आहे. त्यामुळे ‘ऑर्किड ऑरा २०१७’ ही वाचकांसाठी एक पर्वणी ठरली आहे. या नियतकालिकाचे विविध स्तरांतून कौतुक होत आहे.
नियतकालिकाचे विद्यार्थी संपादक स्नेहा हारके व आदित्य चव्हाण यांनी यासाठी विशेष परिश्रम घेतले. ‘ऑर्किड ऑरा २०१७’चे संपादक शिवाजी चव्हाण, उपसंपादक प्रा. बसवराज बिराजदार आणि महाविद्यालयाचे प्राचार्य डॉ. जे. बी. दफेदार यांनी नियतकालिकासाठी विद्यार्थ्यांना विशेष मार्गदर्शन केले.
